Spillpikene

 

Er det nokon som har stelt sweetrollen din? Slik lagar du nye!

For dei som ikkje kjenner til «sweetrolls», så er dette eit bakverk frå The Elder Scrolls-serien samt Fallout 3. Det er kanskje TES V: Skyrim sine sweetrollar som er mest kjende, mellom anna fordi byvaktene vil erte deg med setninga «Let me guess, someone stole your sweetroll?» (jævlar!).

Dette treng du:

Eg har ei eiga bundt-bakeform, som er perfekt til sweetroll-forma. Du kan likevel bruke muffinsformer og liknande, og heller forme sweetrollane når dei er ferdigsteikte.

– 400 g brunt sukker
– 150 g smør
– 500 g kveitemjøl
– 4 dl lettmjølk
– 1 ts bakepulver
– 2 egg
– 2 ts kanel

…og glasuren:

– 40 g nøytral kremost
– 2 s melis
– rør ut med vatn til ønska tjukkelse

 

Steg for steg!

1. La egga og smøret få romtemperatur før du byrjar bakinga. Set omnen på 190 grader.
2. Bland brunt sukker og smør i ein bolle. Det enklaste er å bruke ein miksar, men det kan òg gjerast for hand.
3. Når blandinga har fått ein lysebrun farge, tilset du dei to egga og rører litt til.
4. Tilsett så mjølka, kanel, mjøl og bakepulver, og rør enda litt til!
5. Den ferdige røra skal vere rennande, og det er ikkje krise dersom den har litt klumpar.
6. Røra er klar for forma – dersom du vil ha Skyrim-utsjånaden kan du sette bakepapir i forma i staden for smør (sjå bilete).
7. Du kan no sette bakeforma i midten av omnen, og steike sweetrollane i 20-30 minutt. Stikk gjerne noko i dei på slutten av baketida for å sjå om dei er gjennomsteikte.
8. Når dei er ferdiga tar du dei ut av forma, og legger dei på ei rist. Skjer ut eit hól i midten på kvar enkelt.
9. Bland kremost, melis og vatn som glasur. Tjukna av glasuren bestem du sjølv med kor mykje vatn du tilset. Start gjerne med éi spiseskei.
10. Dekorer sweetrollane med glasuren medan dei er litt lunkne, for å få den perfekte, rennete Skyrim-utsjånaden. Et voilà!